محتجالكم

زاد الاردن الاخباري -

السلام عليكم ورحمة الله وبركاته

بداية أنا من متابعي زاد الأردن من فترة طويلة بس عمري ماعلقت ،

أنا حابه أحطلكم مشكلتي ويمكن كتير منكم مايعتبرها مشكلة وممكن أتعرض للسخرية والإستهزاء من وراها ، بس أنا حابة أعرضها عليكم ومتحملة منكم أي تعليق سواء كان بالإيجاب أو العكس ،

أنا سيدة عمري 32 سنة متزوجة من 11 سنة ومعي أربع أطفال الله يخليهم لإلي ولجوزي ، والشكر لله أنا عايشة حياة أسرية مستقرة وبدون مشاكل وبحب جوزي وولادي وبيتي وبالمقابل جوزي بيحبني ومرتاح معي كتير.أنا مشكلتي يلي متعباني كتير ويمكن متل ماحكيت فوق انكم هتشوفها تافهة وسخيفة ومابتستحق مجرد القراءة ، لكن هيا مسببالي احراج كبير ، ومشكلتي يا أفاضل إني ما بعرف أرفص يعني قصدي بالأفراح يلي بنعزم عليها ما بقوم أرقص مش تكبر مني أو تعالي لأ ولكن لأني مابعرف وبخاف تعرض للإحراج إذا رقصت لأني راح أخبص ، وقبل أكم يوم صار معي موقف محرج وبالتحديد يوم الخميس وكان فرح لناس قرايب جوزي وهناك ألحوا علي أقوم أرقص وأصروا إني أقوم فأنا قمت ورقصت شوي بلي تفهموه ولاحظت في كام بنت بلشوا يضحكوا على من أول ما بديت رقص لأنو أكيد رقصي بيضحك لأني مابعرف وأنا تدايقت وانحرجت كتير وحسيت حالي ولا اشي وانسحبت ورحت قعدت مكاني.

أنا حاولت كتير تعلم الرقص وتدرب عليه لكن مش عارفة ما عندي تقبل لتعليمه يمكن هاد راجع لأني تربيت في بيت كتير صارم ، كانت إمي الله يرحمها حازمة معنا بأمور كتيرة وخاصة إنا كنا أربع بنات بالبيت فكانت متشددة معنا كتير باللبس والحكي والضحك وهيك طلعنا كتيير جديين ، بتزكر كانت إمي الله يرحمها تحكيلنا دايما هاد المتل "كشري عن نابك الكل يهابك" فأنا حابة تفيدوني برئيكم وبكون جدا شاكرة إلكم ويعطيكم الله ألف عافية وبتشكر كتير زاد الأردن يلي سمحتلي أحط مشكلتي هون.

 

تحياتي