يا نقابة مهندسين السلط .. شو هالتكريم؟؟؟

لقد دأبت السلط على تكريم أبنائها منذ سنين إلا أنه لتكريم نقابة المهندسين ( السلط ) هذا العام كان مختلفا ليس كما عهده أبناء المدينة؛ و لا بد من الوقوف على هذا التكريم لمعرفة حيثيات الحدث المنتظر بالنسبة لأهل مدينه رجالاتها منذ فجر التاريخ وهم البناة لهذا الوطن الغالي ، ومعكم أبو حمدان حتى يخبرنا شو صار بالتكريم .. أبو حمدان يجري اتصالا مع صديقه أبو سالم ليأكد للذهاب إلى التكريم وذلك لأنه قد تم دعوته من قبل النقابة لهذا الحفل وذلك لما يتمتع به أبو حمدان من حس اجتماعي له أصداء بالمدينة حيث لا يترك شاردة ولا واردة إلا ويكون من الناس المتقدمين لحضور الفعاليات والمشاركة حيث يكون بالصفوف الأولى ورصد لنا الوضع والحدث أبو حمدان ، أبو سالم يرد على أبو حمدان قائلا له : أنا غير مدعو لهذا التكريم روح يا زلمه وبعدين بنتشاوف ولكل حادث حديث 0
أبو حمدان : يا أبو سالم أنا بدي أروح مشان صاحبي المهندس ( )لأنه من الناس اللي أكيد رايحين يتكرموا ؛ أبو سالم : معاك حق والله إنه المهندس ( ) طول عمره من الناس اللي إلهم بصمات واضحة بالسلط خاصة وبالأردن عامة ؛ أنا أشهد بأنه يستحق التكريم على كل حال بارك له بس تشوفه وأنا انشاء الله بدق عليه تلفون وبباركله لأنه بستاهل0
أبو حمدان عند وصوله إلى موقع الاحتفال يتفاجأ بأنه لا ذكر للمهندس ( ) في هذا الحفل؛ لا ذكر ولا شكر، وتفاجأ أن المهندس ( ) غير موجود أصلا ؛ أبو غازي صديق أبو حمدان بسأله : يا أخي شو مالك حايص لايص ؟ شو بيه ؟ شايفك متظايق ؟ أبو حمدان : طبعا أنا متظايق مش بس شويه كثير بتعرف ليش ؟ لأنه صديقي المهندس ( ) مش من الناس اللي بدها النقابة تكرمها وهاظا اشي فاجأني ومش قادر ألاقي مبرر لعدم تكريمه ؟؟؟
أنا مش عارف ليش النقابة سوت هيك ؟ ما هو مهندس وشخصية إلها بصمات كثير واضحة بالمدينة ؛ والله يا أسفي يا أبو غازي أنا ما كنت أتوقع إنه حتى التكريم بيه زيد وعبيد هاظا مش حكي بنقابة زي هايه النقابة اللي إلها موجوديتها0 أنا كثير عتبان عاللي بصير عنا بالسلط ؛ أي هوه من قليل صار تهميش للمناصب وتجميد للكراسي اللي عليها السلطيه ؛ الحقيقة إذا إحنا مع بعض هيك! كيف الغربية معانا
أبو غازي : معاك حق ؛ طل وشوف كيف كل الناس مش عاجبهم الطريقة ولا الأسلوب اللي صار بيه التكريم الحق على مين ؟؟؟؟ وبعدين أنا مش عارف إذا السلط اللي كلها حمايل وعشاير بصير بيها هيك هاظا كيف المحافظات اللي ما بحملن هايه المواصفات ؛ أنا فعلا معاك بس إذا كانت النظرة لهايه المواضيع عنا بالسلط ينظر إلها بهايه الطريقة فعلا على السلط السلام .أبو حمدان : انشاء الله تصير الكراسي تطير مثل الحمام من تحتهم مشان يصيروا يخابطوا من حيط لحيط والله يا أبو غازي إذا بتطل عالناس بتنصدم من كثر الغرور وكأنه الشغلة عداوة أو انتقام ؟ هاظا مش منطق ؟ أبدا والكرسي ما بدوم لأي مسؤول لأنه اللي بحب وطنه وبحلف يمين الإخلاص لازم يكون قد اليمين وقد المسؤولية اللي بده يتحملها إحنا مش بحارات
المميز لازم يتم تكريمه واحترامه مين ما كان وأنا مش رايح أسكت لأنه اللي بغار على مدينته بحس بأهلها وبتمنى يشوف كل الخير ملموس عند كل اللي إلهم أيادي بيضاء وفضل على هذا المكان مثل المهندس ( ) اللي عمل بكل جد وكل عناء وعمل في بلدية السلط من اجل خدمة اهلها و في عمان ايضا ولا ننسى انه محب لمليكنا و للوطن ، و احنا بنتشرف بكل سلطي بالمدينة صغير ولا كبير وشو ما كانت وظيفته إله كل الاحترام والتقدير0 أبس الواحد ما بيده اشي إلا إني أنا مستنكر بعض الأساليب اللي قاعدة بتصير، على كل حال الشغلة معنوية مش ماديه اللي بنسولف عنها، أبس هالمدينه صار بيها كل اشي احتكار وكل اشي حصريا بتلاقيه بيها ؛ والجبر على الله ،الله يسترنا من تاليها .
أبو غازي : حتى مجرد هايه الفعالية التكريميه يا أخي زي ما تفضلت العزيمة بيها كانت حصرية ؛ أنا تفاجأت ولا الجماعة بدقوا عليه تلفون وبخبروني ؛ طبعا هاظا الإشي ما تعودنا عليه بنقابة المهندسين فرع السلط ، ما انته عارف الدعوة عنا عادة بتكون عامة ؛ أبتدريش شو اللي خلاهم يسووا هيك،
يحاول ( ابو هارون ) توجيه سؤال للذين تم تكريمهم إلا أن الحضور ما توقع الطريقة التي كانت فيها تهميش ابو هارون وذلك لما حوته هذه الفعالية من أمور غامضة وقد تم تجنب الإجابة بطريقة أو بأخرى .
----------------------------------------------------------------------------------------------
نحن دائما نقدر لأهل العزم عزائمهم ؛ وما كانوا يوما ليبخلوا من فكرهم وعلمهم وعملهم على أمتهم إلا أننا نقول أن لا مبرر لما حدث في الاحتفال التكريمي الذي جرى في النقابة )فرع السلط ) فنحن كوسط شعبي ما عهدناك يا نقابه هكذا فلا خلود إلا للخالد وهو الله عز وجل ؛ ولودامت لغيرك ما وصلت لك وإن كانت النقابة قصرت بحق المهندس ( ) وأمثاله ؛ إلا أننا نحترمهم كأهل مدينه ولا ننسى ما قدموه لها فلهم كل الحب والتقدير منا مهما كبرنا وعلا شأننا ،، إلى اللقاء ... مع يوميات ابو حمدان في موقع اخر

Hikmat_b@yahoo.com