ما هو افضل طريقة للأرتباط؟

زاد الاردن الاخباري -

ما هو افضل طريقة للأرتباط؟

انا شاب مغترب ، عمري 30 سنة، من حوالي 4 سنين مغترب في السعودية، طبعا لأنه ما لقيت فرصة مناسبة بالأردن ولأنه كان راتبي متدني حوالي 380 دينار تركت الأردن بعد ما اجاني عقد عمل بالسعودية، قررت مثل اي شاب ارتبط، بس مش عارف محتار لأسباب كثيرة، أولها انه كنت حاب اتعرف على بنت اعرفها وتعرفني لفترة بعدين اتقدملها ، المهم انه اعرفها ، يعني بالشغل او زي هيك، مش قصدي اي علاقة مع العلم انه عمري 30 سنة وعمري ما كلمت بنت او عشت ما يسمونه قصة حب، لأكثر من سبب اولها انه كنت مشغول بدراستي وثانيا انه اضطراري للغربة، المهم، كيف بدي ارتبط؟ نفسي اتعرف على بنت صراحة وادرسها واعرف لو حتى 50 بالمية من شخصيتها، حاولت الاجازة الماضية انه ارتبط بس شفت 3 بنات ، طبعا تقليدي عن طريق تزكية أمي وما عجبوني، وحدة قوية كثير لدرجة الوقاحة، وحدة وافقت دون ما تشوفني اصلا دليل انها بدها تتزوج وتخلص بغض النظر عن الطرف الاخر وحدة قالت انه ما بتحب تتغرب، انا مشكلتي انه نفسي بنت تعرفني واعرفها من خلال اي طريقة مثلا من خلال الشغل ، وهاد الشي صعب حالياً لانه انا شغلي بالسعودية ، طيب اذا بدي اتقدم لأي بنت أغلب الأهالي ما برضو غير كتب كتاب دون اي فرصة للتعارف وكأننا مش بشر وبس بدهم يخلصوا من هم بنتهم، شو الحل؟؟؟، انا صراحة مقتدر مادياً ومليت لحالي ، لو كنت شاب مثلي وبدك ترتبط ، وبدك تعرف البنت لفترة شو بتعمل؟ او لو كنتي بنت وكنتي بدك تعرفي الشاب وتعرفي صفاته شو بتعملي، طبعا انا ما بقصد تعارف وطلعات وحكي على التلفون بقصد بهدف الارتباط، يعني احنا المغتربين مظلومين من هالناحية، نفسي اتعرف على بنت او التقي ببنت مناسبة وتوافق مخيلتي، طيب هي عمري 30 سنة، متى رح التقي، اذا مل لقيت ما رح اتزوج هيك قناعتي، لانه انا ببساطة مش مستعد ارتبط مع بنت بلا ما اكون متأكد من انه نسبة التوافق عالية، لانه انا بحب الراحة والاستقرار. طبعا في مشكلة ثانية بالزواج التقليدي انه تزكية الأهل والأقارب لبنت معينة بتكون مبنية على مصالح، مثلا بنت ابصر مين بدهم يمشوها حتى لو مش حلوة او مش كويسة وصفاتها سيئة المهم يمشوها على حسابنا، متى بنعرف الصح بعد ما التقي فيها، او في شباب بنضحك عليهم يعني من الأساس ليش بدلوا هيك وبيحرجونا مع الناس؟؟؟
مالحل؟