اخي الصغير

زاد الاردن الاخباري -

اخوي الصغير عمرة (11) سنة اخر العنقود، بختلف عنا (احنا خواتو) بكل اشي، لا بحب الدراسة، وبحب المصاري كتير، والمشكلة اللي اهم من هيك، اللي هي بسمع بمدرسته من الأولاد الفاظ بزيئة، وبجي بيحكيها عنا بالبيت، طبعاً يعني احنا كل عمرنا ما حدا صدر عنو هيك حكي، حتى ابوي ما بيصدر منو وحتى اخوي الكبير ما عمرنا اسمعنا منو كلمة عاطلة، طبعاً ابوي بهدلو كتير وضربو بس على الفاضي الا ما يرجع يحكي هالحكي، المشكلة انو ابوي كتير بحبو لأخوي الصغير وبخاف عليه كتير فببهدلو بعدين برجع بصالحو، طبعاً احنا لما كنا صغار ما كان ابوي يعاملنا هيك ابداً كنا ازا ما جبنا بالامتحانات علامات امنيحة كنا ناكل بهادل كتير، وما كنا نسترجي نطلع بوجه ابوي، وما انقدر نحكي معاه اسبوع، وكان كتير متشدد علينا، من ناحية الدراسة، فطبعاً هادا الأسلوب جاب نتيجة منيحة معنا، لإنو الحمد لله هلأ كلياتنا متعلمات وهينا بنشتغل وكل الناس بتشهد بأخلاقنا ، لكن اخوي الصغير مدلل بشكل كبير، يعني شو ما بدو ابوي بجبلوا، طبعاً انا اختو نصحتو كتير وبحاول استخدم الأسلوب السلس وأسلوب الشدة، طبعاً احنا الله سبحانه وتعالى رزقنا بس بولدين الحمد الله، فعشان هيك ابوي كتير بحب اخوي الصغير وبخاف يأسى عليه.

هلأ كمان شغلة بأخوي اللي هية العدوانية داخل البيت، يعني ازا اختي الصغيرة اتخانقت معو بموتها من الضرب، بس ازا حدا من خارج البيت (المدرسة، او حدا من ولاد عمي) ما بيقدرلهم وما بيضربهم، طبعاً ابوي سجلوا بنادي كراتيه، بس ما بحب يروح عليه وبتحجج بميت حجة عشان ما يروح على النادي، ومو اجتماعي، وبخاف بالليل ينام لحالو (لحد هلأ بنام عند امي وابوي)

هلأ الخلاصة، او الإشي اللي انا حابة اوصلوا، انو كمان كم سنة ان شاء الله، اخوي رح يصير مراهق وانا كتير خايفة عليه لإنو ازا من هلأ وهو طفل هيك، فكيف كمان كم سنة، خايفة عليه يصير يدخن، ويصير صايع (بعيد الشر) خايفة عليه وخايفة على مستقبلو خايفة عليه بعد ما يفوت الأوان يصحى على حاله

حابة اعرف نصائحكم حتى 1- ما يرجع يحكي حكي بزيئ 2- يصير يحب الدراسة ويدرس 3-يخلص من شغلة الخوف والإنطواء اللي عنده

وشكراً