الحب حفرة الاغبياء

زاد الاردن الاخباري -

العنوان جزء من شخصيتي يمكن من الغباء او من الحفرة

المهم انا فتاة ابلغ من العمر 27 سنة متعلمة وبشتغل وعايشة هون واهلي بالرياض دراستي الجامعية كانت بالرياض لكن شغلي هون انا عشت 3 سنين هون ومابدي امدح بحالي لاني رح اتكذب من الكل وانا عارفة مابفكر بشي اسمه حب ولا بعتبره موجود حاليا او بالاصح مابصدق انه موجود صاحباتي اللي بعرفهم بحاولو يقنعوني انه موجود وانا مش مصدقة من فترة وحدة منهم حكتلي عن شب معجب فيه وبدو يتعرف انا رفضت الموضوع وحكتلها بدو يتعرف يفوت عدار اهلي من بابه واصرت وجننتني وهي تحكي بهالموضوع المهم انا وافقت انه يحكي معي بوجود اختي الكبيرةبحكم انها بمقام والدتي حاليا وبمكان عملها والشب وافق واجى واجتمعنا بوجود اختي واختي وضحتله انو لو بدو يوصلي مافي غير الطريق الصح وبالفعل انا وافقتها على هالشي لكن الشب اعتذر انه حاليا وضعه مابسمحله ( مش عارف انا الناس بتحكي عن الحب وهي مش مستعدة اله ليش ؟؟؟)) وحكتله اختي لما تحسن وضعك بتيجي وطلب منها رقمي وانه يصير يطمئن علي كل فترة وهي اعطته وانا بس عرفت عن هالشي بهدلته وبطلت ارد على اي تلفون منه او من اختي لاني زعلانة منها الكل بلومني اني غلط ولازم اعطي فرصة للشب وخصوصا اني معنسة متل مابحكوا

( هههههههههه وبعتذر على اللفظ )

لكن وحياة ربي اني مابدي اعمل اي علاقة مع اي شب خارج نطاق الشرع ومشان هيك برفض اي شي يكون بهالطريقة مع العلم اني قادرة اعمل علاقات منوعة وخصوصا لوحدة بوضعي لا عليها لا رقيب ولا حسيب ( طبعا ربنا الرقيب والحسيب لكن كلامي كله هادا كلام مجتمع وفقط ) وانها اجتني فرص كتيرة بهالصورة وانا مارضيت لحد ماقرب يروح علي قطار الزواج متل مابحكوا 

والكل بحكي عني معقدة والمشكلة ان الشب بحاول يوصل الي باي طريقة وانا مطنشة كل نظرة الشباب للبنات صارت بس بنطاق التعارف وبس او بنطاق الحب والتسلاية ومافي حدا بفكر بجد بالحلال غير لما يكون عنده مليون علاقة على الاقل طبعا الا مارحم ربي والمشكلة اني بشوف صاحباتي بحكوا مع شباب وبقابلوهم وبعيشوا قصص حب وبالاخر بتزوجو دغري وانا متل مابسمع من الكل حولي انو فش حدا متطلع فيكي لانك معقدة مش عارف شو بدي احكي عن هالموازين البشرية لكن فعلا الواحد يعتزل الناس كلها ويريح راسه احسن اله بعرف انه في كتير من القراء رح يتمسخروا على كلامي لكن انا بحكي عن مشكلة اجتماعية موجودة بهالمجتمع الغريب بشكل كبير ياريت تفهموها منيح وتعلقوا من منطلق ناس فهمانه اما ازا انتو معتبرين هالحكي مسخرة يبقى بيكفيني ضحكتهم وبهيك بتكونوا على راسي وعيني

للمعلومية انا كاتبة في جريدة وحابة اعرف تفكيركم الراقي كيف رح يوصلني حتى احكم على المجتمع بعقلانية ومنطقية ونسب ومعلومات

وبشكركم اولا واخيرا