زوجي سبب لتعاستي

زاد الاردن الاخباري -

أنا متزوجه الي ٤ سنين وعمري ٢٧ سنه وعندي طفلين ولله الحمد بس مشكلتي تكمن انه زوجي بنظر لالي نظره احتقار باني ناصحه وجسمي بشع للعلم أنا طولي ١٦٨ ووزني ٧٠ ( ما كتبت وزني الا بس ااوجهلكم وجهت نظري ) اي نعم بعرف اني مليانه بس أنا ما الي مخلفه غير ٣ اشهر بس هو دائماً بجرحني بموضوع الوزن بكلام يحسسني اني بشعه وهو متحملني حتى كلام حلو ما بسمع منه او اي تصرف يحسسني اني انثى وأكيد فاهمين شو قصدي كل حكيه اهانه لالي لانه هو كتير نحيف طوله ١٨٠ ووزنه ٧٠ أنا ما كنت مقصره عملت اكتر من مره رجيم و لعبت رياضه بس كنت احمل وانزل بعديها وآخر مره لعبت فيها رياضه حملت البطنه التانيه وهلا لله الحمد خلفت

حاولت اشرحله انه بعد ٦ اشهر بدي اروح عند أخصائي تغذيه واشترك بجيم بس الموضوع بده صبر بس لا حياة مع من تنادي لدرجه اني كرهته وكرهت حياتي معاه و نهارت ثقتي بنفسي ما بدي احكيلكم انه كان يستحي يطلع معي على اي مول (على فكره أنا عايشه بأبو ظبي) وخصوصا بالأشهر الاخيره وانا بحسرتي اقعد ابكي ليش هيك حياتي شو اعمل اذا بالحمل بنفش ويجيب الولد وزنه ٤ كيلو و طوله ٥٢ سم والله حاسه بتعاسه الله وحده بيعلم فيها عفت حالي وعيشتي كمان أنا ما بكتب هيك غير عشان افضفض شوي عن يلي بقلبي لانه بعرف مشكلتي سهله وحلها برجيم والعب جيم بس اوقات بحس زوجي بقارني مع اي وحده بشوفها وهدا يلي مخوفني منه