يا خبز أمي---- ما أطيبك!!

كم من المرات نذهب لشراء الخبز ولكن هيهات خبز اليوم ورغيف أمي رحمها الله ليست هي فحسب بل جميع أمهاتنا وجداتنا اللواتي أنيط بهن تأمين رغيف الخبز وصناعته على الرغم من قلة الإمكانات المتاحة ،إلا أن لخبز أمي نكهة خاصة ورائحة خاصة ؛ولكن خلينا نشوف الحنين ومع أبو حمدان --
أبو موفق يلتقي مع أبو حمدان في أحد المخابز ؛ كيف حالك ؟ وشوه أخبارك ؟ يا زلمه الواحد مهوه قادر يعلك لقمة الخبز على سنانه لا عالطقم ماشيه اللقمة ولا عالعادي ولا تشبيه تقول إنه رغيف الخبز مصنوع من المطاط مش من الطحين ؟
أبو حمدان : والله يا أبو موفق تسديقا لكلامك إنه مره جارنا أبو سرور قاعد بوكل بشراكه تصور إنه طلع طقم الطواحين الملزق ؛ لكن الله ستره مليح ما بلع الطقم مع اللقمة ؛ فعلا ما بتلاقي مخبز يبيع الخبز الطري وفوق هيك بتلاقيهم بحطوا على العجين زيت وحليب وخميرة فوريه ولكن مع الأسف اللقمة مش هنيه سق الله أيام خبز الطابون بتذكر يا أبو موفق كيف إنه كانت أمك تقعد عالمعجن بيه أكثر من صاع طحين تخبزه وريحته لحالها بتشهي والله كانت تشدنا من لما نكون بأول الحارة ؛؛؛؛الله عهذيك الأيام
أبو موفق : جاي تقلي أي أنا ما بنسى المرحومة لما كانت تخبز الشراك اللي كانت ريحته من بعيد ولا لما أخر المعجن تعجنلها قرصين لزاقيات عالصاج وهات لحق آبييه سقا الله وأيام أمي وأمك وكيف رغيف الخبز المدور بأديهن قال بالصيف يخبزن عالصاج وبالشتاء يخبزن عالفرن إشي طابون و اشي خبز عادي-- آه وقديش بشتاق لخبز أمي، أبو حمدان : وأنا والله كمان أبس شوه تقول بجيل هالأيام بدهنش الحياة غير
خبز مخبوز وميه بالكوز. أبو موفق : بتعرف إنك رجعتني لقبل خمسين سنه لما كان بحارتنا مخبز تنور لأبو إبراهيم التركي وكان يسمح لكل دار بأخر الأسبوع تجيب عجنتها وتخبزها على مخبز التنور عفكرة
أمي تعلمت الخبز اللي بشطه وخبز البوري وخبز التنور هاظا كله من أم جانيت التركية وبتذكر كيف كانت أمك الله يرحمها توزع خبز الشراك عالجيران اللي ما يعرفوا يخبزوه أي هيه هايه أيام وهذيك أيام
أقولك حتى المخبز الآلي خبزه غير صحي و غير المشاكل اللي بنسمع عنها في المخبز نفسه من ضرب و من شتائم و غيرها ، ليش .. الله اعلم ؟؟ الواحد بس يتفرج على برنامج دليل المستهلك ويشوف كيف المخابز والعمالة الوافدة وقديش الإهمال وعدم النظافة بصير ما إله نفس بكل الخبز اللي بالمخابز .
أبو حمدان : لا يعني ذلك إنه كل المخابز عل هايه الشاكلة بيه مخابز بتراعي شروط الصحة العامة والحقيقة إذا كانت العمالة غير وافدة يعني العامل الأردني لما يكون بخبز يصنع بأديه لقمة الخبز بتذكر إنه لازم يكون بيها أمانه ونظافة أكثر لأنه رح يوكل هاظا الرغيف ابنه أو أخوه أو أمه ----الخ
هون السولافه بتفرق كثير أنا بتمنى إنه يجي يوم على الأردن ويكون كل الخبز بأيدي أردنيين وما بيه داعي للعمالة الوافدة تصنعنا لقمتنا وللأسف بتتفاجأ إنه أكثر المخابز يملكها المعلم الخباز المصري وما بتلاقي مخبز يحمل سمة المخبز الأردني للمعلم الأردني فلان إحنا ما بدنا أولادنا يتعالوا على هايه المهن الشريفة والله يسلم إيدين كل الصنايعية اللي بفتخروا بهايه المهنة ويصنعونا رغيف الخبز اللي هوه لقمة العيش للشعب الأردني الحبيب وسقا الله وريحة رغيف الخبز الطيب من إيدين أمهاتنا الأردنيات خوات الرجال بتمنى إنه يرجع رغيف زمان__________ علواه يرجع رغيف الخبز البلدي
نحن نشاطرهما الرأي ونطلب من وزارة الصحة تكثيف الرقابة على رغيف الخبز ؛ لما له من أساسيات في الحياة اليومية -------وكم من أنواع الخبز قد رأيت وكم قد تذوقت فلم أذق لا أشهى ولا أطيب من خبز أمي ---- رحمها الله و رحم جميع الامهات -
إلى اللقاء أحبائي وقرائي الأعزاء في موضوع آخرمع يوميات أبو حمدان --------- قريبا


Hikmat_b@yahoo.com