وضعي يقلق راحتي

زاد الاردن الاخباري -

انا اتأخرت كتير لما كملت دراستي بسبب ظروف معينة يعني درست وانا عمري 26 وانهيت دراستي وعمري 30 سنة وبعد هيك حصلت على وظيفة واشتغلت وهلأ صارلي 8 سنوات بشتغل والمشكلة انه انسيت حالي او بالأحرى تجاهلت و أهملت موضوع الزواج ..
وهلأ لما صحيت على حالي لقيت قطار الزواج فاتني صار عمري 38 سنة بدأت عندي المخاوف وبلشت احس بالقلق والخوف من الوحدة والأيام الجاي وشو بتحمل معها من قسوة .. بدأت احس بحاجتي للأمومة والاطفال وبحس حالي صرت متعلقة كتير بالاطفال لدرجة اني لما اشوف مراجع جاي مع طفله اتعلق بطفله وانسى حالي وشغلي ...
انا عارفة انه فرصتي ضعيفة كتير بالزواج والانجاب وحتى لو بدي اتزوج ما رح يكون في وقت للإنجاب ..واحساسي بالخوف بزيد يوم عن يوم وخصوصاً لما انفرد بنفسي واكون لحالي بعيدة عن الناس بحس اني بختنق بتهرب بالنوم او بالزيارات لأشغل حالي .. وكتير بنحرج وبتضايق لما حدا يسألني عن عمري بينصدموا لما بيعرفوا لأنه مش مبين علي يعني الي يشوفني بفكر انه عمري بأول العشرينات جسمي رشيق ورياضية ومو مبين علي ابداً ..
هلأ سؤالي الكم كيف ممكن اتغلب على هذا الشعور وابطل احس بالخوف والقلق من بكرة ، صح كل شي بإيد ربنا وكل شي قسمة ونصيب بس بردو انا انسانة والي مشاعري وحاجاتي النفسية .. يعني ممكن مع مرور الايام هذا الخوف يروح ؟؟؟ ولا رح يضل ملازمني باقي حياتي .. لا تفكروا اني منزلة الموضوع هون لأدور على عريس انا اصلاً رافضة مبدأ الزواج عالنت لأنه عنجد ما في علاقات جدية وواضحة عالنت ..
بتمنى انكم تساعدوني بإني اتغلب على هاي المشاعر السلبية الي خانقيتني لو ما تزوجت واستقريت ... وكيف ممكن اعيش بائي حياتي وحيدة بدون زوج واطفال الي بعتبرها حاجة غريزية عند اي انسان