ريحة غازك يا بلادي !!!

ما صدقنا وسمعنا انه في غاز ببلادنا ,,, يعني صحيح طول عمرنا بنسمع بغاز الريشة ,,, ومش عارف ليش حظه المعثر نوجد بمنطقة الريشة ,,,ممكن لأنه وزنه خفيف مثل الريشة وبطير بسرعة بالجو بدنا نضغطه ونحافظ عليه أحسن ما يطير من بين أدينا ’,’’ ,, لكن حظنا انا كنا نسمع بيه طول عمرنا وما شفنا اشي منه يسر البال حتى تحققت الآمال وسمعنا بإتفاقية ال ((ب ب )) يعني بريتش بتروليوم الي مش عاجب حد القسمة الي راحت معظمها الها على البارد المستريح ,,,!!

الناس ثارت ثائرتها على الاتفاقية والمثل عندنا بيقول تا ييجي الولد بنصلي على النبي ,,, ومنيح الي صرنا نسمع بأنه هنالك شركات بدها تنقب وتخرج النا الغاز بعد سلسلة من المعاناة من الغاز المصري الي اصبحت قصته قصة ما الها نهاية بعهد حكم العسكر بمصر صار كل يوم تفجير للخط وينقطع عنا الغاز وحكومتنا تشكي من أمرها ومن حالها الي ما بيسر تا تأزم الوضع ووصلنا لحالة متعثرة ,,,!! وصار بدنا ندور على حل مثالي ,,والحكومة بتشتكي من الملايين الي بتدفعها على شكل خسائر من هذا الانقطاع ’’’

والشعب مش مصدق سياسة الحكومات ,, الكل بيقوول كل الي حوالينا عنده بترول وليش احنا ما عندنا ,,,ليش بحاولوا يقنعونا انه احنا بلد فقير بكل شىء حتى بالمي ,,,صحيح الفوسفات والبوتاس والاسمنت والاتصالات كلها خصخصوها وباعوها وآخرها غاز الريشة ,,, لكن لازم يطلع عندنا بترول زينا زي غيرنا !! هذا ما بده مي ولا بنزرع زراعه ,

الخبر سمعه الأردنيون وسر بالهم وممكن يحقق آمالهم للسنوات الجاية بدل حالة الفقر الي اصبح كل مواطن يشكي منها ونخلص من ((مهتها )) الحكومات بإسطوانة الغاز الي بتسم ابدانا صبح ومسا وعند كل طبخة مركبه على الغاز انه الحكومة داعميتها من اجل سعادة وهناء المواطن وحتى تنضج طبخته بشكل كويس !!

يعني ما بدنا تظل الحال معثرة وننتظر استخراج الزيت الصخري ولا ننتظر طاقة طوقان ,,,بدنا نعيش بأمن وأمان ونشعر بقيمة الانسان بدل معاناة ونكد حتى خلفت الناس قلت وهيك مش مناسب للحكومات حتى تلاقي ناس وقت الملمات تدفع الها وانشاءالله بيجي الفرج وبتصير حكوماتنا تعطي وما توخذ لما تتحق آمال الشعب ويعيش برخاء وهناء ونصير نقول (( الله يكثر خير الحكومات )) !! يعني ندعي الها بدل ما ندعي عليها !!! ونصير نغني على موالنا ((ريحة غازك يا بلادي نشمه ليل نهار ,,, ))