الى متى ؟؟؟

زاد الاردن الاخباري -

السلام عليكم ورحمة الله وبركاته

الى رواد زاد الافاضل اختصار للمقدمات والحكي اللي ماله فايدة بدي ادخل بمشكلتي بشكل مباشر

يا جماعة انا متزوجة من 7 سنوات وحياتي الحمدلله عادية متل هالناس بواجهة ضغوطات الحياة وخليها ع الله المشكلة بدأت من ما يقارب من 10 شهور اللي هي وفاة الوالدة رحمة الله عليهاواللهم اغفرلها,,,, طبعا انا اصغر وحدة باخواني واخواتي عمري 27 سنة جميع اخواني واخواتي متزوجين ما عدا اختي البكر (( اكبر وحدة بالاخوان والاخوات )) ما صار لها نصيب لتتزوج وهي رافضة فكرة الزواج المهم طبعا والدي متوفي من اكثر من 6سنوات كانت الحجة واختي عايشين مع بعض وهلا ضلت اختي وحيدة ,,, بعد وفاة امي وانتهاء بيت الاجر عرضت على اختي تيجي تنام عندي كم يوم لحتى ما تشعر بالوحدة والحزن بعد ما فضي البيت عليها واجت فعلا وهون بدأت المشكلة انا حكيت تنام عندي كم يوم لحتى اخواني يلاقو حل وللعلم بيت اهلي واسع وملك والملك لله طبعا لكن تفاجئت انها اختي عاشت عندي وبدل الكم يوم صارت ايام وشهور وانا صار الوضع متعب من كل النواحي زوجي ما بياخد راحته ابدا ولا حتى انا وما في لا منطق ولا عقل بيرضى انه البنت تنام ببيت اختها وبيوت اخوانها موجودة وبيت اهلها موجود حكيت كتير مع اخواتي واخواني بس ع الفاضي ما في اي نتيجة ايجابية للموضوع كانها حمل والجميع بدو يرميه علي وحدي ,,,لمتى؟؟؟

انا تعبت جدا من هالموضوع يعني وصلت مرحلة مو عارفة اخد راحتي ببيتي زوجي مو معترض عليها بالعكس بيحكيلي عادي خليها بس انا بعرف انه هو مش مرتاح,,,صارت اختي تربط حياتها بحياتي صرت محاسبة على كل شيء ببيتي يعني انا اولها كنت من باب التعاطف معها ومن باب الاخوة وحزني عليها انا بحبها بس كمان وجودها صار يضغط على حريتي وراحتي ببيتي وكمان اختي من النوع الاناني يعني صرت حس انها هي صاحبة البيت مش انا حكيت كتير مع اخواتي واخواني وكل الناس بتحكي ما بسير تضلها عند بيت الغريب عن زوجي واخوانها موجودين وهي من النوع اللي ما بتتحمل اولاد اخواني وحاسة حالها مرتاحة عندي كتير نحن بنحاول نوفرلها الراحة بس راحتها صارت على حساب حريتنا انا وزوجي وابني,,, هدا غير نظرة بيت حماي الي يمكن ما بيحكو قدامي بس انا بعرف انه بينحكى من وراي انه ابنهم مش مجبور باختي والله انا تعبت ومو عارفة شو اعمل ,,,,حتى عرضت على زوجي انا نرحل ونسكن ببيت اهلي بدل الايجار ومنه هي بترجع لبيتها بس زوجي رفض وحكالي بكل الحالات نحن حنكون المسؤولين عنها ,,,, شو اعمل انا والله احترت بتمنى من القراء نصيحتي بشكل منطقي بعيد عن العواطف لاني انا فكرت بعاطفتي طلعت على راسي وانا بعرف انه اجري عند رب العالمين بس كمان ان لنفسك عليك حق ولزوجي اقل حق انه يرتاح ببيته

بجد مو عارفة شو اعمل هي بتحبني وحاسة انه زوجي منيح معها ودايما تسالني انتم متضايقين من وجودي بحكيلها لا عادي (( يعني هو انا بدي احكيلها بوجها اه متضايقين )) شو الحل برأيكم ؟؟؟؟