شو مشكلة مجتمعنا؟

زاد الاردن الاخباري -

انا فتاة عمري 26 سنة الحمدلله على قدر عالي من العلم و الالتزام و الاخلاق و الكل بيشهدلي بهالشي ..شغلي كتير ممتاز و الحمدلله انا مبسوطة و ناجحة فيه .. الحمدلله مو ناقصني شي و ما عندي مشاكل .. بس ما بعرف شو مشكلة المجتمع معي!!

تقدملي شباب كتير لكن ما صار نصيب وانا راضية بنصيبي ..لاني بعرف انه الزواج رزق من رب العالمين و لا اعتراض على حكمة الله
انا اكبر واحدة في اخواتي.. و اخواتي الاصغر مني انخطبوا..ومن وقتها بلشت المشاكل.. صارو الناس ينظرولي و كأني معاقة او ناقصني شي.. الي بواسيني والي بنظرلي نظرة شفقة .. و اللي بتهيأله اني "غيرانة" مع اني فرحتلهم كتيييييير..والي بحكيلي"يلا بسيطة ان شالله بيجي نصيبك" وكأني انا رح انتحر ازا ما تزوجت..الخ الخ

ليش مجتمعنا بيلغي كل نجاحات البنت و كل كفاءاتها و بفكر انه الشي الوحيد الي لازم تنجح فيه هو الزواج ..مع انه هاد هو الشي الوحيد اللي مو بايدها ليش سعادة البنت مرتبطة بالزواج فقط..نفسي تتغير نظرة مجتمعنا لهالموضوع ..ازا تزوجت خير و بركة و ازا ما تزوجت مو معناها نلغيها و ننظرلها نظرة انه ناقصها شي.. بتمنى تتغير هالنظرة و نصير نشوف الاشياء من زواياها الصحيحة ...

بتمنى تكون وصلت وجهة نظري و بتمنى اسمع ارائكم..شكرا