إلحَقْ حرامي

إلحَقْ حرامي يا ناس يا هُوه
هربان ف. أيده جنيه هاتوه
هربان ف. أيده جنيه هاتوه
من غير ما يِجْرُوا عليه لاقُوه
واقف فْ. حالُو أم جابُوه
ودقيقه واحده وكَتَّفوه
وابْكاسْ وطاخ دُوُل دَغْدَغُوه
ويمين شمال.. ياد اسمك ايه؟
وشويَّه ع. القسم وخادُوه
وف. أيد أمينه استودَعُوه
سَلُّومه مَبْيِرحمش ابوه
ضمُّه بحنان قَطْر وعليه
طاخ طيخ وقالُه بتسرق إيه؟!
تِلْبِسْ قضيَّه عشان جنيه!
حِتِّةْ جنيه!!
أم قالُّه والله العظيم
ما سرقت شيء
د انا صاغ سليم
كلِّ الحكاية باختصار
داير جعان طول النَّهار
والجوع مَلُهْشْ عليه ملام
وهناك وعند النِّيل تمام
بَصِّيت لاقيت
زِيطُه وكلام
وأساتذه واقفين خد وهات
فكَّرت إنِّ مُهِمِّ مات
مين مات
مين مات
اهاتي صوات عليه؟!
بعدين لقيت
رَفَعُمْ جنيه
أخضر لِفُوق مَعْرَفْشْ لِيه
وشِويَّه أَمْ حاكمين عليه
لازم يعوم.. لازم يعوم
علشان يعيش
لازم يعوم
مَعْرَفْش كان عَيَّان بإيه
طب مين أذاه وتعبان بإيه!
دا كان زمان
لو شافتُه عين
كانت تشوفه كأنُّه بِيه
أجْدَعْها بِيه
وف. لحظه واحده وطَيَّرُه
وشويَّه ع. الميَّه الْتَقُوه
عَمَّال بيغْطَسْ قُلْت إيه
هَنْسِيبه يِغْرَق ولَّا إيه
وناديت يا ناس..
يا ناس ياهوه
طَبْ كُنتُوا حاولوا تْدَرَّبُوه
أو كنتوا حاولوا تْفَهِّمُوه
مُشْ مرَّه واحده تغرَّقُوه
إيه الهَمِّ دا اللي بتعملوه
يا ناس ياهوه
لو غالي فيكم إلْحَقُوه
وامّا الْتَقِيتْهُم فرحانين
بِيْهَنُّوا بعض
ومَبِسُوطين
حَسِّيت كأنِّي هَمُوت عليه
و ف.نفسي قلت حرام عليك
يغرق جنيه
كدا بين عنيك
وانت الهوَى
ماسكوه بإيديكِ
ياد طِير عليه
إيه يجرى يبقى معاك جنيه!
تِتْعَشَّى حتَّى بلُقْمَه حاف
ولحدَّ إمته افضل أخاف..
نَطِّيت عليه
ف. المَيَّه وامَّا طلعت فوق
ماسك الجنيه
حَضْنُه بإيديه وكُلِي شُوق
بَصِّيت لاقيت النَّاس
ف. لحظه اتجمَّعوا
وف. طلعه واحده عليَّه
نادوا وصَرَّخوا
إلحق حرامي يا ناس يا هوه
هربان ف. أيده جنيه هاتوه
هربان ف. أيده جنيه هاتوه

محمد محمد علي جنيدي
m_mohamed_genedy@yahoo.com
9 شارع مصطفى كامل من شارع الجمهورية / بنى سويف / مصر
محمول/ 0105785807 / 002 ---- ت منزل وفاكس / 0020822314602